عبدالقادر الخراز صحفي الحدث 24 الدي كسب قلوب المغاربة
عبدالقادر الخراز الضابط الممتاز في الشرطة القضائية المتقاعد وصحفي موقع الحدث 24, وصاحب الفيديوهات الشهيرة على اليوتيوب والرجل الدي كسب قلوب المغاربة .
فمن هو عبدالقادر الخراز وكيف كسب شهرة في وقت قياسي ؟
لا عجب أن هذا السيد لقى إستحسان كبير و قبول ليس له نظير عند الجمهور المغربي و غانقوليكم علاش ... الخراز ضابط ممتاز و وجه إعلامي معروف من إيامات ميدي أن و دوزيم و أخطر المجرمين ، و لكن قبل ما يكون ضابط محنك لا يشق له غبار ، هو حرفيا الصورة النمطية ال typical ديال الرجل المغربي المحض . بداية بالمظهر ببشرة سمراء زيتية تميز الإنسان الشمال إفريقي و المغربي خاصة ، تم وجه ذو تراسيم لا هي حادة و لا منونخة بل هي عوان بين ذلك ، و موسطاش كث أبيض يمتاز به الأب المغربي عن زملائه الأباء من كل بقاع الأرض
مرورا بالشخصية لي هي حرفيا شخصية لي كايشوفها أي مغربي فراسو لكن بدرجات متفاوتة ، شخصية لي عمرك غاتفهمها حيث عبارة عن مولينيكس ديال المواقف . ماتايحملش الخوانجية و لكن رجل مؤمن و صادق ، كايكلاشي اللحاية و لكن يعتبر الدين المعاملة ، يصلي و يصوم و لكن كايضرب الطاسة و يعوم ، و يعترف أنه داق الماحية ديال اليهود بكل صدق و شفافية إيامات البرد ، يؤمن بأركان الإيمان ، مشا للحج و لكن غايوصي مراتو تبعو فالجنازة نهار يموت ،ينتقد المسؤولين ديال المؤسسات حيت ماكايجيوش فالوقت و لكن ملكي مخزني حتى النخاع .
هاذ ال mix عمرك غاتلقاه عند تا شي واحد من غير الإنسان المغربي القح ههه داكشي لاش كاتشوف الكومونترات عامرين عندو بكاتشبه ليا بالأب ديالي و كانحس بيك بحالا الأب ديالي و كذا و كذا ... و راه حيت حرفيا هذا أفضل شخص جسد ال comportement المثالي ديال الإنسان المغربي لي فيه فيه دنيا و دين. ربما الأغلبية كايعتابرو هادشي نفاق أو إزدواجية المعايير لكن أنا كانشوفها أفضل حاجة و ديك flexibility هي كاتخليك تعيش مرتاح و متصالح مع ذاتك ، شخصية وسطية معتدلة على أحسن ما يكون ، و حظور قوي و كاريزما بوليسية فارضة راسها و ماعندهاش بزاف مع خيطي بيطي زيطي ماكاين غا أغراس أغراس ، زيد عليها خبرته في الميادين حتا ولى خبير بسيكولوجي للمغاربة و قوالبهوم و كايعرف الشخص إمتا كايقول الصح و إمتا كايكذب خصوصا العيالات .
و يكفي تشوف الصورة و القميجة كحلة و الخلفية سوداء ، و الكاميرا كاتخليك مركز فقط على وجهو و ماتشتت الإنتباه ديالك تا حاجة ، كاتخليك تحس بلي كاتشوف غي فشي زعيم عائلة مافيا من نيوريوك بحال Gotti مروبل ال fbi في خمسينيات القرن الماضي ، بدون ما ننساو طبعا اللمسة الشخصية ديالو لي هي " و شديناه زيرناااااه " و لي هي كلمتان خفيفتان على اللسان ثقيلتان في إيصال الفكرة ، من شيفون فازك و قرعة و مسمنات سخان ... ساهموا في الحفاظ على الأمن القومي للبلاد لأزيد من 10 قرون ، كل هذه عوامل ساهمت في وصول الخراز بسهولة إلى قلوب المغاربة و تيموا به أيما تيمم لأن الخراز ليس شخصا بل فكرة ، و الفكرة لا تموت
و السلام عليكم ورحمه الله تعالى وبركاتيييه , عفوا و بركاتوووه .